jan Kikamesi. utala pi jan Kuwawa

jan Kikamesi li jan lawa pi ma tomo Uluku. jan Enkitu li kama tan ma nena. jan Enkitu li jan pona tawa jan Kikamesi. ona li jan sama. ona li wawa mute.

wile wawa

jan Enkitu li toki ala. ona li pilin ike li pana e telo oko. jan Kikamesi li lukin e ona li toki e ni: "jan sama o, sina pilin ike tan seme?". jan Enkitu li open e uta ona li toki e ni: "luka mi li kama wawa ala. wawa mi li kama lili". jan Kikamesi li toki tawa ona li toki e ni: "o tawa! mi tu o tawa nena pi kasi suli. nena ni li weka tan ni. ona li lon tawa nasin pi anpa suno. kasi suli mute li lon ma ni. palisa pi kasi ni li sewi li kiwen. kasi suli sama li lon ala ma mi. taso jan Kuwawa li lon nena pi kasi suli. jan li kama tawa kasi suli ni li wile pakala e ona li wile kama jo e ona la jan Kuwawa li utala e ona li moli e ona. jan Kuwawa li ike li wawa mute. mi wile e ni: jan ike li lon ala ma. o tawa sewi nena! sina en mi li utala e ona, li anpa e ona, li moli e ona!".

wile pi nimi suli

jan Enkitu li toki e ni: "jan sama o, jan sewi li wile e ni: jan Kuwawa li lon ma kasi ni. jan sewi Enli li wile e ni: jan Kuwawa li moli e jan. soweli li tawa lon ma kasi la jan Kuwawa li ken kute e kalama lili weka. jan seme li ken kama tawa ma kasi ni? kalama uta pi jan Kuwawa li sama kalama pi telo suli wawa. uta ona li sama seli. kon pi uta ona li sama moli. sina wile utala e jan ni tan seme? mi tu li wawa sama ala jan ni. mi ken ala anpa e ona".

jan Kikamesi li toki tawa jan Enkitu li toki e ni: "jan pona mi o, jan seme li ken tawa sewi kon sewi? jan sewi taso li moli ala. tenpo suno mute pi jan ma li kama pini. jan li moli. jan li pali e ijo. taso ijo ali ni li sama kon. tenpo ni la sina pilin ike tan ni: sina ken moli. wawa sina li lon seme? pona. mi lawa e sina. tenpo pi tawa mi li kama la sina toki e ni tawa mi: »o tawa, o pilin ike ala!«. jan ike ni li anpa e mi li moli e mi la jan mute li toki e ni: »jan Kikamesi li utala e jan wawa Kuwawa li kama anpa li kama moli». tenpo kama la jan lili mi li toki e ni: »jan Kikamesi li utala e jan wawa Kuwawa«. tenpo mute kama la jan li toki e ni: »jan Kikamesi li utala e jan wawa Kuwawa lon nena pi kasi suli li kama moli lon utala ni«. nimi mi li kama suli".

kulupu pi jan sona

jan Kikamesi en jan Enkitu li tawa supa pi ma tomo. jan lawa Kikamesi li toki e ni: "jan ali o kute! mi wile kama tawa jan wawa Kuwawa li moli e ona. jan li jo ala e mama li jo ala e meli la mi wile e ni: jan ni tawa poka mi". jan mute li kulupu poka ona. jan Kikamesi en jan Enkitu li tawa jan pali pi ilo utala. ona li pali e ilo suli pi kasi suli e ilo palisa utala suli li pana e ilo ni tawa ona.

jan Kikamesi li kama tawa kulupu pi jan sona pi ma tomo Uluku li toki e ni: "mi wile kama tawa jan Kuwawa li utala e ona li moli e ona. nimi mi li kama suli. nimi pi jan tan ma tomo Uluku li kama suli". jan sona li toki tawa jan Kikamesi li toki e ni: "jan lawa o! sina wile utala e jan ike ni tan seme? pilin sina li suli li wawa sama pilin pi jan lili. taso sona sina li suli ala. jan Kuwawa li ike lukin li wawa mute. kalama uta pi jan Kuwawa li sama kalama pi telo suli wawa. uta ona li sama seli. kon pi uta ona li sama moli. sina ken ala anpa e ona. wile sina li pona ala".

jan Kikamesi li toki tawa jan Enkitu li toki e ni: "jan pona mi o! jan ni li toki e nimi Kuwawa taso la ona li pilin ike kin". ona li toki e ni: "jan sona pi ma tomo Uluku o! mi jan lawa. jan Enkitu li tawa poka mi. ona li kama tan ma nena li suli li wawa. mi tu li ken anpa e jan wawa Kuwawa lon nena pi kasi suli".

jan sona li toki tawa jan Kikamesi li toki e ni: "o tawa! jan sewi sina li pana e pona tawa sina!".

jan sewi Utu

jan Kikamesi li tawa tomo pi jan sewi Utu. ona li moli e soweli lili li sewi e luka ona. ona li toki e ni: "jan sewi Utu o! mi wile kama tawa jan Kuwawa li utala e ona. mi wile e ni: nimi mi li kama suli. sina sona li pona. o pana e pona tawa mi! o kama e ni: mi anpa e jan wawa ni li jo e sijelo pona li tawa ma tomo Uluku". taso jan sewi li toki ala.

jan Kikamesi li pana e telo oko. ona li toki e ni: "jan sewi Utu o! mi moli e jan Kuwawa la mi toki mute e pona sina li pali e sitelen sina kiwen". telo oko pi jan Kikamesi li pona tawa jan sewi Utu. ona li toki tawa jan Kikamesi li toki e ni: "jan Kikamesi o pilin pona. mi lawa e kon tawa. mi jo e kon tawa seli. mi jo e kon tawa lete. mi jo e kon tawa telo. mi jo e kon tawa pi ko kiwen lili. mi jo e kon tawa tan ma lete. mi jo e kon tawa tan ma seli. o tawa nena pi kasi suli! o utala e ike". jan sewi Utu li kulupu e kon tawa mute lon insa lupa pi nena kiwen.

jan sewi Nintu

jan Kikamesi li toki tawa jan Enkitu li toki e ni: "jan pona o kama poka mi. o tawa tomo suli pi mama sewi mi". jan Kikamesi li lawa e jan Enkitu tawa tomo pi jan sewi Nintu. ona li kama lon insa tomo li toki e ni: "mama o, mi wile kama tawa jan Kuwawa ike li moli e ona. o toki pona e mi tawa jan sewi Utu!". jan sewi Nintu li telo e sijelo ona li len e len pona lukin. ona li pana e linja sike tawa anpa lawa ona. jan Nintu li tawa tomo sewi pi jan sewi Utu li sewi e luka li toki e ni: "jan sewi Utu o! sina li pilin ike tawa ike ali. jan lili mi li wile anpa e ike. jan Kikamesi li wile anpa e jan wawa Kuwawa. o pana e pona tawa jan lili mi".

jan sewi Nintu li toki tawa jan Enkitu li toki e ni: "sina jan pona pi jan Kikamesi. sina jan sama pi jan lili mi. jan Enkitu o, sina jan lili mi". ona li toki e nimi ni: "jan lili mi o tawa poka jan Kikamesi! o pana e pona tawa ona. o utala e ike ali poka ona". jan sewi Nintu li toki e nimi pona wawa li pana e linja sike pi anpa lawa tawa jan Enkitu.

nasin tawa pi ma pi kasi suli

ona li kama tawa. jan Kikamesi li lawa. ona li jo e ilo suli pi kasi suli e ilo utala palisa suli. jan Enkitu li tawa lon monsi pi jan Kikamesi. ona kin li jo e ilo pi kasi suli e ilo utala palisa. kulupu pi jan mute li tawa lon monsi jan Enkitu li jo e ilo pi kasi suli. ona li tawa nasin tawa pi nena pi kasi suli.

tenpo suno la ona li tawa. ona li tawa weka mute tan ma tomo Uluku. tenpo pimeja li kama la ona li pali e lupa pi telo pona. tenpo suno sin la ona li weka e telo pona lili tawa jan sewi Utu. jan sewi li lukin e ona li pilin pona. tenpo suno sin la ona li tawa nasin pi nena pi kasi suli li tawa weka mute mute tan ma tomo. tenpo pimeja sin la ona li pali e lupa pi telo pona li weka e telo pona lili tawa jan sewi.

lape pi jan Kikamesi

ona li tawa nena suli loje walo. jan Kikamesi li weka e ko pan pona tawa ma li toki e ni: "nena o pana e lape pona tawa mi!". tenpo pimeja li kama. jan Kikamesi en jan Enkitu li anpa. ona tu li pilin e luka pi jan sama li lape. jan Kikamesi li pini wawa e lape ona li toki e ni: "jan Enkitu o, sina toki ala toki tawa mi? sina pilin ala pilin e mi? lape mi li pini tan seme? mi lape li lukin e ni: mi utala e soweli wawa. ona li tawa wawa e noka ona li tawa e ko kiwen. tan ni la kon li pimeja. luka mi li wawa ala. mi ken ala anpa e ona. jan ante li tawa mi li pana e telo tawa mi. ona li pona".

jan Enkitu li toki e ni: "jan pona mi o, lukin lape sina li pona. jan Kuwawa li nasa lukin li wawa lukin. taso ona li sama ala soweli wawa ni. soweli wawa pi lape sina li jan sewi Utu. tenpo utala la ona li pana e pona tawa mi tu. mama sina kin li pana e telo tawa sina. ona li jan lawa Lukapanta".

ma pi kasi suli

tenpo suno li kama. ona li tawa sewi nena li kama tawa poka pi ma pi kasi suli. ona li awen li toki ala. ona lukin taso e kasi suli mute. ona li lukin e ni: kasi suli li sewi mute. nasin pona li lon insa pi ma pi kasi suli. tenpo mute la jan Kuwawa li tawa lon nasin ni. noka ona li pali e nasin ni. seli suno li ken ala kama tawa insa pi ma kasi tan ni: kasi ni li suli mute. pimeja ni li lete li pona.

ona li tawa lon insa pi ma pi kasi suli. jan Kikamesi li lukin li toki e ni: "ni li kasi suli pona". ona li kama jo e ilo li anpa e kasi suli. jan Enkitu li weka e palisa tan kasi suli ni.

wawa sewi

jan Kuwawa li kute e kalama li pilin ike wawa. ona li toki wawa e ni: "jan seme li kama tawa ma mi li pakala e kasi suli mi?". jan Kuwawa li pana e wawa sewi tawa kalama ni. wawa sewi ni li sama kon li sama suno. ona li tawa sama ilo moli linja. jan Kikamesi li kama anpa li lape. jan Enkitu li lape. jan ante tan ma tomo Uluku li lape sama soweli pona lili.

jan Enkitu li pini e lape. kalama ala li lon. ona li pilin e jan Kikamesi kepeken luka ona. jan Kikamesi li tawa ala. jan Enkitu li toki wawa e ni: "jan Kikamesi o! jan sama o! tenpo pi suli seme la sina li lape kin?". jan Enkitu li tawa wawa e ona li toki wawa tawa ona.

jan Kikamesi li open e oko ona li tawa sewi. ona li toki e ni: "ike a! jan ni li jan ma anu jan sewi?". jan Enkitu li toki e ni: "jan Kuwawa li wawa mute. jan pona o tawa ala jan ni! mi mute o tawa weka tan ma ni. o tawa ma tomo Uluku". jan Kikamesi li toki tawa jan Enkitu li toki e ni: "mi wile lukin e jan ni, li utala e ona. o pilin pona. jan tu li ken ala moli. sina en mi li ken anpa e ona".

utala li kama

jan sewi Utu li toki tawa jan Kikamesi li toki e ni: "o awen ala! jan Kuwawa li len e wawa sewi wan taso. ona li jo e wawa sewi mute lon tomo ona. sina awen la ona li ken len e wawa sewi ali. o tawa!".

ona tu li tawa wawa tomo pi jan Kuwawa. jan Kuwawa li tawa ona. jan Kikamesi li toki wawa e ni: "mi jan Kikamesi li jan lawa pi ma tomo Uluku! jan Kuwawa ike o kama moli!". ona li wile utala e jan Kuwawa kepeken ilo utala palisa. jan Enkitu li kama tawa utala kin poka ona. taso ona li ken ala utala e ona. jan Kuwawa li tawa wawa weka tan nasin pi ilo utala. kalama uta ona li sama kalama pi telo suli wawa. uta ona li sama seli. ona li utala la ma li pakala. nena suli li tawa. kon li kama pimeja. jan Kikamesi li pilin ike li pana e telo oko. ona li toki e ni: "a! ona li wawa mute. mi ken anpa ala e ona. jan sewi Utu o! o pana e pona tawa mi!".

kon tawa mute

jan sewi Utu li kute e toki pi jan Kikamesi. ona li weka e kon tawa mute tan insa lupa pi nena kiwen. kon tawa seli li utala e jan Kuwawa. kon tawa lete li utala e ona. kon tawa telo li utala e jan Kuwawa. kon tawa pi ko kiwen lili li utala e ona. kon tawa tan ma lete li utala e jan Kuwawa. kon tawa tan ma seli li utala e ona. kon tawa mute li utala e jan Kuwawa. ona li ken ala tawa. tenpo ni la jan Kikamesi en jan Enkitu li ken tawa ona li ken utala e ona kepeken ilo utala ona.

jan Kuwawa li awen. sinpin pi lawa ona li kama pona lukin. ona li toki e ni: "jan Kikamesi o kute e mi! jan lawa wawa o moli ala e mi! mi sona ala e mama mi. nena suli li mama mi. jan sewi Enli li wile e ni: jan li wile pakala e kasi suli ni la mi utala e ona li moli e ona. o pilin ike ala tawa mi! mi wile e ni: sina jan lawa mi. mi anpa e kasi suli mi li pana e ona mute tawa sina. o moli ala e mi. o weka e mi".

moli pi jan Kuwawa

jan Kikemesi li pini pilin e ike tawa jan Kuwawa. ona li toki tawa jan Enkitu li toki e ni: "jan li kama jo e waso lili la jan li wile weka e ona li wile e ni: ona li tawa mama ona. ni li pona ala pona?". jan Enkitu li toki e ni: "o kute ala e jan Kuwawa. ona li ike. o weka ala e ona. sina weka e ona la ona li pakala e nasin tawa ma tomo Uluku lon ma ni li utala e mi mute". jan Kuwawa li toki e ni: "jan Enkitu o, toki sina li toki ike li toki utala. jan lawa sina li pana e moku tawa sina. tan ni taso la sina tawa lon monsi ona. tan ni la sina wile ala e ni: jan Kikamesi li jan lawa mi kin. jan anpa o! o toki ala!".

jan Enkitu li pilin ike wawa. ona li utala wawa e jan Kuwawa kepeken ilo utala palisa li weka e lawa ona tan sijelo ona. jan Kuwawa li anpa lon ma. kasi suli mute li kalama sama pilin ike.

nimi suli

jan Kikamesi en jan Enkitu li anpa e kasi suli. jan Uluku li pali poka ona. jan Enkitu li toki e ni: "jan sewi Utu li pona mute. mi wile pali e sinpin suli pi lupa pi tomo ona. kasi suli ni li pona mute tawa pali ni". ona mute li anpa e kasi suli mute.

jan sewi Enli li tawa ma pi kasi suli. ona li lukin li toki tawa ona tu li toki e ni: "sina moli e ona tan seme?!". ona li toki ike e ni: "seli li pakala e sinpin sina! seli li moku e moku sina! seli li moku e telo sina!". jan sewi Enli li kama jo e wawa sewi pi jan Kuwawa li tawa weka.

ona li kama jo e kasi suli mute li tawa tan nena pi kasi suli tawa telo tawa Pulatu. ona li wan e kasi suli mute li pali e supa tawa mute. ona li tawa lon supa ni li tawa e ona lon telo tawa kepeken palisa. nasin ni la ona li tawa lon telo. tenpo suno mute lili pini la ona li tawa ma tomo Uluku. jan mute li kulupu li toki e ni: "o lukin! o pilin pona! ona li jan utala pona kin!". nimi ona li suli.

jan Ote