Friday 25 March 2011

jan lawa Oliki

jan Oliki en soweli tawa, tan V.M.Vasnetsov

jan lawa ma Oliki li kama tawa utala li tawa kepeken soweli tawa. ona li kama tawa jan pi sona mute li toki e ni: "jan sona o toki e ni tawa mi: tenpo kama la mi pilin pona ala pona? mi kama moli tan seme?"

jan sona li toki e ni: "jan lawa o! sina kama suli li wawa. sina anpa e jan ike sina ali. sina lawa e ma e telo. jan ala li ken anpa e sina. taso sina kama moli tan soweli tawa sina ni".

Friday 18 March 2011

toki suli Intenasijonale

len loje, tan Ssolbergj

o kama! jan pali o kama!
o utala lon nasin sin!
mi pilin sama nena seli
tan ni: jan mani li lon kin.
mi o utala e nasin mani
o sin e jan, o sin e ma.
jan pali kin li kama suli.
ona li jo e pan e ma.

ni li utala pini.
tan ni la jan li lon
ma Intenasijonale.
jan pona sin li lon.

Friday 11 March 2011

pipi musi en pipi pali

pipi musi en pipi pali, tan A.Rackham

pipi musi en pipi pali li lon ma sama.
tenpo seli ali la pipi pali li pali mute li pali e tomo.
ona li pali mute li kama jo e moku.
tenpo sama la pipi musi li musi li kalama musi.
tenpo lete li kama.
pipi musi li jo ala e tomo anu moku.
ona li tawa sinpin tomo pi pipi pali li toki e ni:
"mi wile moku. o pana e moku tawa mi.
mi pilin lete. o open e lupa.
mi wile awen lon tomo sina".
taso pipi pali li toki e ni:
"tenpo seli ali la sina kalama musi.
tenpo ni la o tawa musi!"

jan Ote

Friday 4 March 2011

jan Kikamesi. jan Enkitu li kama

jan lawa pi ma tomo Uluku

ma tomo Uluku li lon. sinpin pi ma tomo Uluku li sewi li suli. sinpin ni li kiwen. tomo Enana li tomo pi jan sewi meli Inana. sinpin pi tomo Enana li kiwen. sinpin ni li walo sama suno. o tawa tomo pi jan sewi Inana! o lukin! jan ante li pali ala e tomo sama. jan lawa ante li pali ala e tomo sama. jan seme li kama pali e ijo ali ni? jan Kikamesi li jan lawa pi ma tomo Uluku. ona li kama pali e tomo sewi ni e sinpin ni. ona li suli. jan Kikamesi li utala sama soweli wawa. ona li pakala e sinpin kiwen. ona li lawa e kulupu pi jan utala ona. ona li jan lawa. jan seme li ken sama e ona? jan seme ken toki e ni: "mi jan lawa"?