ma Alansi

utala, tan ma tomo Pylos

tenpo suli pini la jan Palato li lon ma tomo Asina. ona li sitelen e toki ni:

jan Solon li sona mute. ona li toki tawa jan Kita. toki suli ni li nasa mute. jan Kita li mama mama pi jan Kita sin li toki e toki ni tawa ona. ona li toki e ni:

jan Solon li tawa ma Akito. ona li wile sona e ni: tenpo suli pini la seme li kama? jan Elena ante li sona ala e ni. tan ni la jan Solon li toki tawa jan pi sona sewi pi Akito. jan sona li toki e ni:

"jan Solon o! sina Elena li sama jan lili. sina sona ala e tenpo suli pini.

tenpo suli mute pini la ma Asina li suli. jan Asina li pona li sona. lawa ona li pona. pali ona li suli. ona li utala pona.

mi tawa weka

toki musi, tan Codex Borbonicus

toki musi tan lipu toki "Cantares Mexicanos"

tenpo wan taso la mi ali kama lon ma,
lawa pi jan Sisimeka o.
o pilin pona, o lon pona e kasi kule.
tenpo lili taso la mi lon ma.

ni li lon: mi tawa. ni li lon.
mi tawa weka. ni li lon kin.
ni li lon: mi tawa weka tan kasi kule en tan toki musi
en ma… ni li lon: mi tawa. ni li lon kin.

mi tawa ma seme? mi tawa weka tawa ma seme?
ma ni la mi moli
anu mi lon sin?
jan ala li kama moli lon ma seme? ma ni li lon ala lon?

ma taso la
kasi kule en toki musi pona li lon.
ona li mani ali mi li namako mi.
o pilin pona!

lawa pi jan Sisimeka o,
mi tawa tomo pi jan lawa pi jan moli,
tawa tomo pi jan sewi,
tawa lawa pi pimeja en wawa suno.

mi tawa ma ni:
mama mama mi li tawa ma ni.
mi kama anpa tawa lupa suli.
jan ala li awen lon ma.

ma taso la
kasi kule en toki musi pona li lon.
ona li mani ali mi li namako mi.
o pilin pona!

jan Ote

jan pi sona oko

oko, tan Luz Rivera

tenpo mun kama la mi wile jo e lipu sin pi ken lawa pi tomo tawa mi.
mi pilin ike tan ni: lukin mi li kama ike.
mi lukin e lipu toki kepeken ilo oko.
tenpo suno ni la mi tawa jan pi sona oko.
jan li kama sona e ni: mi lukin seme.
mi ken lukin pona e ijo weka.
mi ken ala lukin pona e ijo lili.
jan pi sona oko li pana e telo lon oko mi.
insa pi oko mi li suli.
jan li lukin e oko mi.
jan li lukin insa pi lawa mi kepeken ilo suno.
oko mi li lupa lon lawa mi.
jan li toki e ni: oko mi li pona.
mi ken kin lukin e meli pi pona lukin.

Dave Raftery

nena seli pi ma Isilan

nena seli, tan Boaworm

jan Kanso
ma Isilan la nena seli li kama open li pana kiwen lili mute. ona li tawa sewi li jaki e kon. kon jaki li tawa ma Elopa. kon jaki li ken pakala e tomo tawa kon. tan ni la tomo tawa kon li awen lon ma. jan mute li wile kepeken e tomo tawa kon li ken ala. ona li kepeken e poki tawa ona sama supa monsi li awen.

mi pilin e ni: jan ni o kepeken pona e tenpo ona, o kama sona e toki pona.

mu.

---

akidave
tenpo pini la nena li anpa e telo kiwen lete. nena seli li seli e telo lete. telo mute li tawa anpa tan nena seli. telo wawa li pakala e nasin e tomo. jan lawa li weka e jan mute tan tomo ona. jan sona li toki ni: mun tu tu la nena wawa li ken pana e seli.

François Schwicker (jan Kanso), Dave Raftery (akidave)

tan jan Eloto. pipi pali en kiwen suno

pipi pali suli, tan S.Münster

toki pi tenpo pini, tan jan Eloto

jan Inta ante li poka ma tomo Kapasilo li poka ma Paki. ma ona li tawa lete tan ma pi jan Inta ali ante. ona li jan utala pona. ona li kama jo kiwen jelo suno kepeken nasin ni: ma pi ko pi kiwen lili li poka ma ona. pipi pali li lon ma ni. pipi ni li suli sama soweli pona. (jan lawa pi ma Pesija li awen jo e pipi ni. jan li alasa li kama jo e ona lon ma ni). pipi pali suli li pali e tomo kepeken nasin sama pipi pali ante. ona li pali e lupa lon insa ma. tan ni la ona li sewi e ko kiwen tawa ma. taso kiwen suno lili li lon ko kiwen ni. pipi li pali e tomo la ona li kama e ni: ko pi kiwen suno li lon ma.