Friday 22 July 2011

toki utala pi pimeja soweli

pimeja soweli, tan Matteo Castelli

tenpo suli pini la jan li jo e soweli tawa pi nena kute suli. jan ni li wile esun e soweli li tawa esun. jan ante li lukin e soweli li toki e ni:
– sina wile e mani seme tan soweli ni?
– kiwen mani tu tu.
– mute. mi pana ala e ni.
suno li tawa sewi. seli mute li lon. jan li kama tawa jan esun en soweli li anpa lon pimeja soweli. lete lili, a! ni li pona.
– sina pali e seme? ni li soweli mi!
– seme?
– ni li soweli mi kin. o pana e mani tawa mi!
ona li open e toki utala. ona li tawa jan sona. jan sona li toki e ni:
– sina toki utala tan seme?
– jan sona o, jan ni li kepeken e soweli mi. taso ona li wile ala pana e mani tawa mi!
– ni li lon ala lon?
– jan sona o, mi kepeken ala e soweli ona. mi kepeken e pimeja taso.
– pimeja?
– pimeja pi soweli ni.
– pona, mi sona. sina tu o kute! sina kepeken e pimeja soweli la o kama jo e mani sina tu tu... o nanpa e ona kepeken luka. sina ante o kute! jan ni li kepeken e pimeja pi soweli sina. tan ni la sina kama jo e kalama pi mani ona.

jan Ote

2 comments:

  1. mi sona e toki ni, taso kepeken pini ante...

    ReplyDelete
  2. A donkey's shadow seems to be extremely rich as a topos... cfr.

    http://laudatortemporisacti.blogspot.be/2012/05/donkeys-shadow.html

    ReplyDelete