tan jan Eloto. pipi pali en kiwen suno

pipi pali suli, tan S.Münster

toki pi tenpo pini, tan jan Eloto

jan Inta ante li poka ma tomo Kapasilo li poka ma Paki. ma ona li tawa lete tan ma pi jan Inta ali ante. ona li jan utala pona. ona li kama jo kiwen jelo suno kepeken nasin ni: ma pi ko pi kiwen lili li poka ma ona. pipi pali li lon ma ni. pipi ni li suli sama soweli pona. (jan lawa pi ma Pesija li awen jo e pipi ni. jan li alasa li kama jo e ona lon ma ni). pipi pali suli li pali e tomo kepeken nasin sama pipi pali ante. ona li pali e lupa lon insa ma. tan ni la ona li sewi e ko kiwen tawa ma. taso kiwen suno lili li lon ko kiwen ni. pipi li pali e tomo la ona li kama e ni: ko pi kiwen suno li lon ma.

jan Inta li kama tawa ma ni tan ni: ona li wile kama jo e kiwen suno. ona li pali e ni: ona li jo e soweli pi monsi nena. soweli ni ken tawa wawa sama soweli tawa li ken jo e kiwen mute lon ona. jan Inta wan li kama jo e soweli mije tu e soweli meli wan. soweli meli li mama pi soweli sin. soweli sin li wile moku e telo mama. taso jan li weka e mama tan soweli lili. jan li tawa kepeken soweli mama. soweli mije li tawa lon ona.

jan Inta li sona e ni: seli li ike tawa pipi pali. suno li kama sewi la seli li kama lon. tenpo pi seli mute la pipi li lon tomo ona. tenpo ni kin la jan li kama lon ma ni. pipi li lon anpa ma li ken lukin ala e ona. jan li kama jo e ko pi kiwen suno li pana e ona tawa insa poki. tenpo ni pini la ona li tawa weka. taso pipi pali li ken pilin e kon jan - jan Pesija li toki e ni - li wile kama jo e jan li tawa wawa tawa ona. ike la pipi pali suli li ken tawa wawa mute. jan li toki e ni: pipi ala ken tawa wawa sama pipi ni. soweli ala ken tawa sama ona. jan ala ken tawa sama ona. jan li ken ala awen e pipi ni la pipi li kama jo li moku e ona.

jan li tawa kepeken soweli pi monsi nena. soweli mama li wile mute kama tawa soweli lili ona. ona li sona e ni: soweli lili li wile moku. tan ni la ona li tawa wawa mute. taso soweli meli li wile ala e ni. ona li tawa sama ala meli. pipi li kama poka jan Inta la jan li weka e meli wan tawa pipi. pipi li awen li moku e ona. ni li lon la jan li tawa wawa. tenpo tu la jan li weka e meli tu tawa pipi. tenpo sin la pipi li awen. jan li ken tawa weka tan pipi kepeken nasin ni.

jan Pesija li toki e ni: tenpo ali ala la jan Inta li kama jo e kiwen suno kepeken nasin ni. tenpo mute lili la ona li pali e lupa ma suli li kama jo e kiwen suno tan ona.

jan Ote