tan jan Eloto. jan pi ma seme li jan nanpa wan?

jan li pana e jan lili

toki pi tenpo pini tan jan Eloto

tenpo suli pini la jan Akito ali li pilin e ni: tenpo open la jan sewi li pali e jan Akito. jan pi ma ante li lon ala kin. tenpo ni pini la jan sewi li pali e jan ante. tan ni la jan Akito li jan nanpa wan.

taso jan Samesi li kama jan lawa pi ma Akito. ona li wile sona e ni: jan pi ma seme li jan nanpa wan kin? jan li sona e ni tan seme? ona li toki tawa jan sona mute. taso jan ala li sona e ni. tan ni la ona li toki e wile ona ni: "jan lili sin li ken toki ala. o kama jo e jan lili sin tu. o weka e ona tan mama ona. o pana e ona tawa jan pi lawa soweli mute. mi wile e ni: jan ala li toki e nimi lon poka jan lili ni. o anpa e jan lili ni li lon insa pi tomo lili. jan lawa soweli li pana e telo mama soweli tan soweli ona tawa jan lili li tawa weka".

jan Samesi li kama e ni tan ni: jan lili sin li mu li ken ala toki. taso tenpo kama la ona li toki e nimi nanpa wan. jan Samesi li wile kute e nimi ni. ni li kama.

tenpo sike tu li kama. jan lawa soweli li toki ala tawa jan lili tu. ona li pana taso e telo walo tawa ona. tenpo suno wan la ona li open e lupa tomo li tawa lon insa ona. jan lili li tawa wawa tawa ona li tawa e luka ona tawa ona. ona li toki wawa e ni: "Peko!". taso jan lawa soweli li toki ala. tenpo li kama. tenpo mute la ona li tawa jan lili li kute e nimi ni. tan ni la ona li toki ni ali tawa jan lawa ona. jan lawa li toki e ni: "o pana e jan lili ni tawa mi". ni li kama. jan Samesi li kama sona e ni li toki e wile ona: jan pi ma seme li kepeken e nimi "Peko"? ona li kama sona e ni: jan Pikija li nimi e pan kepeken nimi ni. tan ni la jan Akito li sona li toki e ni: jan Pikija li jan nanpa wan. jan Akito li jan nanpa tu.

jan Ote