jan Kikamesi. jan Enkitu li kama

jan lawa pi ma tomo Uluku

ma tomo Uluku li lon. sinpin pi ma tomo Uluku li sewi li suli. sinpin ni li kiwen. tomo Enana li tomo pi jan sewi meli Inana. sinpin pi tomo Enana li kiwen. sinpin ni li walo sama suno. o tawa tomo pi jan sewi Inana! o lukin! jan ante li pali ala e tomo sama. jan lawa ante li pali ala e tomo sama. jan seme li kama pali e ijo ali ni? jan Kikamesi li jan lawa pi ma tomo Uluku. ona li kama pali e tomo sewi ni e sinpin ni. ona li suli. jan Kikamesi li utala sama soweli wawa. ona li pakala e sinpin kiwen. ona li lawa e kulupu pi jan utala ona. ona li jan lawa. jan seme li ken sama e ona? jan seme ken toki e ni: "mi jan lawa"?

meli sewi Ninsun en jan lawa Lukapanta li mama ona. jan Kikamesi li suli li pona lukin. ona li wawa li sama jan sewi. jan ala li wile utala e ona.

jan pi ma tomo Uluku li pilin ike tawa jan Kikamesi. jan li tawa tomo pi jan sewi li toki e ni: "jan sewi o! jan Kikamesi li suli li sona. nimi ona li suli li wawa. jan Kikamesi li kulupu e mije. ona li lawa e jan ni tawa utala. tan ni la mama mute li pilin ike. jan Kikamesi li jan lawa pona ala pona? jan Kikamesi li kama jo e meli li unpa e ona. tan ni la jan mute li pana e telo oko. jan Kikamesi li jan lawa pona ala pona?".

jan soweli Enkitu

jan sewi li kute e ni. jan sewi An li lawa e jan sewi. ona li toki tawa mama sewi Alulu li toki e ni: "tenpo pini la sina pali e jan. o pali e jan wawa sin. o pali e jan pi sama jan Kikamesi. mi wile e ni: ona li utala e jan Kikamesi. tan ni la jan pi ma tomo Uluku li ken pilin ike ala".

mama sewi Alulu li telo e luka ona. ona li kama jo e ko pi ma telo li pana e ko ni tawa ma supa. tan ni la jan Enkitu li kama lon. jan Enkitu li suli li wawa. sijelo ona li jo e linja mute. ona li moku poka soweli. ona en soweli li moku e kasi anpa. ona en soweli li moku e telo. jan Enkitu li jan soweli. ona li sona ala e ilo e tomo e jan ante.

jan pi utala soweli

jan pi utala soweli li lon ma ni. ona li pali e lupa ma suli. soweli li tawa insa lupa. nasin ni la jan ni li ken kama jo e soweli. jan li pali kin e ilo pi kama jo. ona li kama jo e soweli li moli e ona. taso jan soweli Enkitu li pakala e lupa ni en ilo ni. ona li kama e ni: soweli li ken tawa weka.

jan pi utala soweli li lukin e jan soweli Enkitu wawa li pilin ike li pilin wawa ala. ona li tawa weka li tawa mama ona. jan pi utala soweli li toki e ni: "mama o, jan soweli li kama tan ma nena. ona li suli li wawa. jan ala li wawa sama ona. mi pilin ike. ona li moku e kasi anpa poka soweli. ona li moku e telo poka soweli. tenpo ali la ona li pakala lupa ma mi en ilo mi. mi ken ala kama jo e soweli tan ona".

mama li toki e ni: "jan lili mi o, jan Kikamesi li lon ma tomo Uluku. jan ala li wawa sama ona. o tawa! o kama tawa ma tomo Uluku. o toki pi jan wawa ni tawa jan Kikamesi. jan Kikamesi li pana e jan unpa Sanka tawa sina. tenpo kama la jan Sanka li anpa e jan soweli ni kepeken unpa".

jan pi utala soweli li kama tawa ma tomo Uluku. ona li toki e ni ali tawa jan Kikamesi. jan Kikamesi li toki tawa ona li toki e ni: "jan pi utala soweli o kama jo e meli unpa Sanka pi tomo pi jan sewi. tenpo kama la ona li kepeken e nasin meli tawa jan soweli ni. tenpo lili la soweli pi jan ni li tawa weka tan ona".

meli pi tomo pi jan sewi

jan pi utala soweli en jan Sanka li tawa weka. tenpo suno mute lili pini la ona li kama tawa ma supa. ona li awen. tenpo suno sin la soweli en jan soweli Enkitu li kama. jan soweli Enkitu li moku e telo e kasi anpa poka soweli. telo en kasi anpa li pona tawa ona.

jan Sanka li lukin e jan soweli Enkitu li kama tawa ona. jan Sanka li weka e len. ona li pilin e luka pi jan soweli Enkitu. meli Sanka li unpa e mije Enkitu. mije Enkitu li unpa e meli Sanka. tenpo suno mute la ona li unpa. tenpo pimejo mute la ona li unpa. ona li pini unpa la jan Enkitu li lukin tawa soweli. taso soweli li pilin ike tawa ona. tan ni la ona li tawa weka. jan Enkitu li wile kama tawa soweli. taso jan Enkitu li pilin wawa ala. ona li ken ala tawa wawa.

jan Enkitu li pilin e ni: ona li ken sona. jan Enkitu li pilin e ni: "mi ken sona. mi pilin. mi jan". ona li kama tawa jan Sanka li anpa. ona li lukin e sinpin jan Sanka li kute.

jan Sanka li toki tawa jan Enkitu. ona li toki e ni: "jan Enkitu o! sina sama jan sewi. sina tawa poka soweli tan seme? o kama".

jan Enkitu

jan Sanka li tu e len ona. ona li len e jan Enkitu kepeken len wan. jan Sanka li toki e ni: "o kama poka mi. o kama tawa jan".

ona li tawa tomo pi jan pi lawa soweli. jan mute pi lawa soweli mute li kulupu li lukin e jan Enkitu li toki e ni: "ona li suli sama jan Kikamesi. ona li wawa sama mun lili pi jan sewi An". ona li pana e pan e telo nasa jelo. jan Enkitu li moku ala. ona li lukin wawa taso. tenpo ala la ona li lukin e pan e telo nasa. jan Sanka li toki ni: "jan Enkitu o moku e moku ni. o moku e telo ni. ni li nasin jan". jan Enkitu li moku e pan mute. ona li moku e telo nasa jelo mute. ona li pilin pona mute. ona li telo e sijelo ona. ona li len. jan Enkitu li jan kin. jan lawa soweli li lape la jan Enkitu li lape ala. ona li kama jo e ilo utala li utala e soweli ike. jan lawa soweli li ken lape pona.

lape pi jan Kikamesi

jan Kikamesi li lape li lukin e lukin lape. ona li pini lape li tawa mama meli. jan Kikamesi li toki e ni: "mama o! tenpo pimeja la mi lape li lukin e ni: mi lukin e mun lili mute lon sewi mi. mun pi jan sewi An li anpa lon poka mi. mi wile tawa sewi e ona. taso mi ken ala tawa e ona. jan pi ma tomo Uluku li kulupu li sike e mun ni. mi anpa tawa ona sama ni: mi anpa tawa meli mi. mi tawa e ona tawa sina tawa ni: sina ken sona e ni: mi tu li sama ala sama.

mama pi jan Kikamesi li sona e ali. jan Ninsun li sona e ali. ona li sona e lukin lape ni li toki e ni: "mije lili mi o! lukin lape sina li ni: tenpo kama la jan wawa li kama tawa sina. ona li wawa sama mun lili pi jan sewi An. tenpo kama la ona li pona tawa sina. ona li pana e pona tawa sina li utala e jan ike sina. ona li jan sama sina. sina olin e ona sama meli olin. mije lili o! lukin lape sina li pona li suli".

jan mije olin

jan Enkitu li tawa e oko li lukin e ni: jan mije li tawa. jan Enkitu li toki e ni: "jan Sanka o, mi wile e ni: jan ni li tawa weka. tan seme la ona li tawa?". jan Sanka li toki e ni: "jan ante o, sina tawa tan seme? sina lukin sama jan pi pilin ike. sina pilin ike tan seme?"

jan mije li toki tawa jan Enkitu li toki e toki ni: "tenpo lili kama la mi wan poka meli olin mi. taso jan Kikamesi li jan lawa. a! ona li wile unpa e olin mi. tenpo pimeja wan la jan Kikamesi li unpa e olin mi. nasin pi kulupu pi jan sewi li ni: tenpo pimeja wan la jan lawa li ken unpa e meli pi jan ante".

jan Enkitu li pilin ike wawa tan toki pi jan ni. ona li toki e ni: "mi tawa ma tomo Uluku! jan Kikamesi li unpa ala e meli sina".

jan Enkitu en jan Sonka li kama tawa ma tomo Uluku.

utala

jan Enkitu li tawa lon nasin pi ma tomo Uluku. jan Sanka li tawa lon monsi ona. jan Enkitu li lon supa pi ma tomo. jan mute li kulupu lon poka ona li toki e ni: "jan ni li kama tan ma nena. ona li wawa. ona li suli sama jan Kikamesi". jan Enkitu li kama tawa tomo pi jan olin. ona li awen lon sinpin pi lupa pi tomo ni. ona li awen noka ona lon sinpin pi tomo ni.

jan Kikamesi li kama. taso ona li ken ala kama tawa insa tomo. ona li pilin ike wawa. jan Kikamesi li kama utala e jan Enkitu. jan Enkitu li utala e jan Kikamesi. ona tu li utala. poka pi lupa tomo li tawa! ona li utala wawa. poka pi lupa tomo li pakala! ona li utala sama soweli wawa. sinpin tomo li tawa!

jan sama tu

jan Kikamesi li awen e ike wawa ona li pini utala. jan Enkitu li toki tawa ona li toki e ni: "jan Kikamesi o! jan ala li sama sina. sina wawa sama jan sewi. mama sewi sina li kama e ni: sina wawa. jan sewi Enli li kama e ni: sina jan lawa. jan Kikamesi o, pini pali e ike tawa jan pi ma tomo Uluku. ona li jan ike ala tawa sina. sina jan lawa pi jan ni".

jak Kikamesi li toki e ni: "toki sina li sona li pona. sina suli li wawa. sina taso li ken toki e ni: sina suli sama mi. jan ante ala ken toki e ni. o sina kama jan sama mi!". jan Enkitu li toki tawa jan Kikamesi li toki e ni: "sina jan sama mi kin!". jan Enkitu li pilin e uta pi jan Kikamesi kepeken uta ona. jan Kikamesi li pilin e uta pi jan Enkitu kepeken uta ona. ona tu li kama jan sama kin.

jan Ote